Այսօր Մոսկուայի մէջ կը հանդիպին նախագահ Սերժ Սարգսեան եւ ՌԴ նախագահ Վլատիմիր Փութին: Բանակցութիւններ կ’իրականացնեն քաղաքական, առեւտրատնտեսական եւ մարդասիրական բնագաւառներուն մէջ փոխգործակցութեան հարցերու շուրջ, ինչպէս նաեւ կը քննարկեն միջազգային ու տարածաշրջանային խնդիրներ:
«Բարձր մակարդակի բանակցութիւններուն ընթացքին կը ծրագրուի քննարկել փոխգործակցութեան հանգուցային հարցերը քաղաքական, առեւտրատնտեսական եւ հումանիտար բնագաւառներուն մէջ, արծարծել ընդելուզման գործընթացներու առաջշարժումը եւրասիական տարածքին մէջ,- ըսուած է հաղորդագրութեան մէջ:- Կը սպասուի, որ նաեւ կարծիքներ փոխանակուին միջազգային ու տարածաշրջանային շարք մը խնդիրներու շուրջ»,- հաղորդած է Գրէմլի մամլոյ ծառայութիւնը:
Յայտնենք թէ այս շաբաթ ռուսական պետութեան ղեկավարը այցելած էր Պաքու, ուր հանդիպում ունեցած էր Ատրպէյճանի եւ Իրանի ղեկավարներ Իլհամ Ալիեւի եւ Հասան Ռուհհանիի հետ: Երբ արծարծուած էր ԼՂ հակամարտութեան կարգաւորումը, Փութին յայտարարած էր, որ Ռուսիան պիտի ձգտի, որ Ատրպէյճանն ու Հայաստանը գտնեն հակամարտութեան երկուստէք ընդունելի լուծում:
All the contents on this site are copyrighted ©. |